GURIT ING SADAWANING MANGSA KETIGA

GURIT ING SADAWANING MANGSA KETIGA

suket-suket garing
godhong-godhong aking
kumrosak suwaraning papringan
nyela padatan
awu hawa ing gegana
wisa rasa jroning nala
pepes ngenes jeriting kewan-kewan
kasatan wit-witan nggagar tan kuwawa
nungka trajanging angin ketiga
ulesing rupa nglawu swasana
mbuntel panyawang mbrangus pangarep-arep
padhanging padinan tan kuwawa
mbusek sureming kahanan
jiwa anglentrih katindhih jeriting ati
nyidhem kekesing wengi-wengi
lakuning dina-dina klunta
krodha laraping sewu bebaya
bakal ngrabasa
esuk nglempuruk
sore nglempere
gumonthang swaraning jam-jam
ngetung sepi
ing sadawaning wengi
ing sadawaning ketiga iki


NGLILIR

tengah wengi
gumonthanging jam bandhul
nduwa lakuku


LUMAKUNING PROSES

sepine mampring
atiku sangsaya garing


JUMANGKAH

sepi surup
jumangkah lumakuning proses :
gumonthanging swara jam



kalender

kalender tuwa wus kesel
album-album wus njubel riyel


ATIS

atis
angin wengi lumaris
kinanthi swara grimis
wengis


OMBAK WENGI

sumusup tengah wengi
kumriwiking banyu kali
nyidhem tetangis
gapuking watu karang
kabuncang ombak tanpa wilang :
kendhang


LEMAH BENGKAH

lemah-lemah bengkah
pinacak ing dina-dina sayah
ilang srengenge
kadhumuk gambare
pangilon pecah


NGACA SEGARA

ilang tapel watesing mripat
dinulu sipat ombaking jagat


WUNGKUL

wilanging-wilang
hamilang wungkuling wulang
hamejang watu karang


GONTHANG

gumawang tebaning awang-awang
sinuwak lekasing konthul nglayang
tanpa dluwang tanpa dlancang


PAGEBLUG

sumuking hawa esuk
katrajang pageblug ambarang amuk
datan kadumuk unthuking bathuk
ndhepani dalan keblasuk
mangiwa datan ana
manengen konjem tumunten
tan kena
sipat nyurasa :
yitna yuwana


JRONING JINEM

jinem lumerem katrem
tumempuh kang lumawat ngruwat
sinambating sesambat
ginayuha ngrebat
adhem ayeming jagat
ngudi padhang jati
ilang panyawang
kedhaping padhang
diyaning jagat lerem tumunjem
ing teleng anuju wang-wang
sumilak ngegawang
kekaroning jagat kawilang
dhamang wijang


MENDHUNG

langit mendhung
kukusing gunung-gunung
kinuwung guna sekti
aji mumpunng


SRENGENGE GIWANG

srengenge giwang temangsang
pucuking godhong-godhong gerang
cacahing wilang kumrambyang
ing awang-awang



CAKRAWALA

kekes rasa
tumumplak tebaning godhong selamba
ngakasa ilang watesing panyawang
karodapeksa


GROBAG SAPI

lampu teplok mati
gumlodhaging rodha-rodha wesi
nglindhes katreming wengi


PLUWIT BUDHAL

stasiyun krodha
jumeriting pluwit sepur tuwa
ndedel angkasa
ninggal ati njarem nelangsa


SASMITA

jatmika rupa
kesrakat budi candhala


TUNA

tuna ngadina-dina
ngedi busana tan mulat
sarira mlarat
kesrakat jiwa
amburu semat
kliwat



RUBUH GEDHANG

rubuh gedhang
anjrahing puspita arum wengi
lumrang angambar janji
tan wijang soroting lintang
yektining uni keri
among godhong tanpa isi



GODHONG-GODHONG ALUM

godhong-godhong alum
kumlawe astane hyang yamadipati
nggelak suruping wanci


TATA GELAR

mencala putra
mencala putri
ilang ganda
saka aruming kembang mlathi


LAIR

binuka esuk
gumerit swaraning kori menga
mecaki dina-dina


NGERES

kekes rasa
kasendhal kumlawening wit-witan
angawe udan


SEDHAKEP

jinem katrem
dak kekep papa sudraku
dak gegem kenceng
sedhakep sedyaku
mantheng


KEJUT

kumrosak papringan
telenging ratri
sentoring angin sungsang
nggonjak pilingan


JAGAT KRODHA

jagat krodha
jalma anyamudana
riwut sengkuting kajat
amburu lena
anungka yitna


AKING

sonya ruri
acluming suket-suket
garing nggrayang langit
ing bumi miring


WARTA

langit jingga
kukusing sandyakala
miyak rungkuting alas tuwa


AWU KETIGA

awu hawa anggegana
laraping angin ketiga
nggonjak ombaking segara
gempuring watu karang


DAHURU

tinuweg-tuweg
jineming wanci wengi
gumruduging angin daya
ngubal sangkrah sabuwana


SWASANA

klawu
ubaling dahuru
nglawu pandulu sarandu


MATU

sidhem premanem
tan kocak wungkuling sepi
nunjem ing ati



PAGIRIS

wisa hawa
dora cara
gandhane abab micara
sumebar nggegana
anjrah misesa


SANDYAKALA

surem-surem
wahyaning hyang diwangkara
nganthi sasmita
laraping hyang sandyakala


GENI NRAKA

uwuhe mblasah
pletiking geni nraka
ngobar impene
godhong-godhong selamba


SIRNA ARUM

sirna arum
kusuma ilang
satriya krodha
eseming kembang



SEGARA RENTAK

segara rentak
sanga nem tumapak
kang kinoyak ginonjak
kang cinandhak sinuwak
jumleguring ombak :
nyingkur sanak


KUKUS BIRU TUWA

kumelun nggegana
kukus biru tuwa pindha
laraping donga panalangsa
miyak keteling mega-mega
lumesat ngawiyat
pecating sukma pegat
raga kinukut tan sisa
ubaling brahma
ing wanci candhikala


CATHETAN KEDADEYAN

(1) 2001 kapisan
pecat atusan nyawa tanpa dosa
bareng lan kumebuling awu wetece
ing new York city


2001 kapindho

wengi natal ing taman
impening wong alus budi
kedhaping lintang nekseni
wutahing getih putih
netepi sahit sejati
ing papan suci kristiani


(2) 2002

ing legian bali
ing bumine para brahmana semadi
nyawane puluhan korban reretu bumi
ngesemi jumebluging bom lampus dhiri


(3) 2003

wus suwe pagere dhedhel
njeblug maneh ing marriot hotel
bom lampus dhiri nyuwek klambi
sing during ketembel wingi


(4) 2004

nginthil rong ewu papat
nglarapake sesambat
sangarepe gedung kedubes australy
bom lampus dhiri nyendhal mayang
nyawane putra-putrining nagri
saka pangkone ibu pertiwi



SAPU WUDHAR

nggrabah pecah
tali sapu wudhar
beling-beling mblasah
sadhadhah cengkar


SISIK MELIK

katon las
saka interaning beras
ing tampahing kauripan
sing kecampur awu panas


ING PASINGIDAN

ing pasingidan
ana sing mbidho api-api
ana sing sedhakep ngawe-awe

nanging aja lali
ana keluk ana pagenine
ana buthuk ana penggandane

wong mbelah nggawa dammar
Gusti Allah ora samar


ING PAGELARAN

semuning tata gelar
bingar sumunar
nggambar kembang mawar
semuning ati sinamun ngasepi
semuning raga tan salaminya kuwawa
ngemut wisa
lelakon purna
semune kabuka ngegla
becik ketitik ala ketara


PAILAN
(1)
wulan ketrajang pailan
sureming wanci madya ratri
nlesih rontoging kembang ing patamanan

(2)
srengenge ketrajang pailan
sureming wanci madya ari
nlesih murcaning embun ing pasuketan


(3)
wit-witan ketrajang pailan
kewan ketrajang pailan
lemah-lemah ketrajang pailan


(4)
mbun-mbunan ketrajang pailan
ati ketrajang pailan
kajiwan ketrajang pailan


(5)
pailan nrajang tan mawang
papan kahanan pawongan
pailan anjrah nrajang
sadawaning rasa pambegan


SUKET-SUKET NJOGED

kinudang angin sengkan
suket-suket jejogedan
kenong genjur ketiplak tiblang
goyang ! goyang !
swaraning kendhang
setengah ngudang
setengah nyemplang


KEGUH

aruh weruh tan wanuh
gumrudug saguh lumawan campuh
biyuh-biyuh segarane sempyuh
ombake worsuh